Dásamlegar vegan vöfflur úr bókhveiti og höfrum
/
Í dag deilum við með ykkur uppskrift að dásamlegum vegan vöfflum úr bókhveiti og höfrum. Vöfflurnar eru frábær morgunmatur en á sama tíma fullkomnar að bjóða uppá með síðdegiskaffinu. Toppið með hverju sem ykkur lystir, sultu, rjóma, ávöxtum, jógúrt, hnetum eða ís. Leyfið hugmyndarfluginu að ráða.
Færsla dagsins er í samstarfi við Naturli á Íslandi og í vöfflurnar nota ég bæði vanillu jógúrtina og smjörlíkið frá þeim. Ég nota vörurnar frá Naturli mikið í bakstur og matargerð og finnst bæði smjörlíkið (vegan block) og smjörið (smörbar) bera af þegar kemur að vegan smjöri. Ég er því alltaf jafn stolt að fá að vinna með Naturli.
Undanfarið hef ég verið að prófa mig áfram með að baka úr öðrum tegundum af mjöli en einungins hefðbundu hveiti. Mér hefur þótt það virkilega skemmtilegt og þessar vöfflur komu einmitt úr einni slíkri tilraun. Ég mundi nefnilega að ég hafði fyrir mörgum árum fengið vöfflur á kaffihúsi gerðar úr bókhveiti og í gærmorgun ákvað ég að prófa að útbúa vöfflur úr haframjöli og bókhveiti og útkoman varð þessar virkilega góðu vöfflur sem ég borðaði í morgunmat áður en ég hafðist handa við að baka þær upp á nýtt og mynda ferlið fyrir ykkur.
Hvernig eru bókhveiti og hafravöfflur öðruvísi en þær sem gerðar eru úr hefðbundnu hveiti? Fyrir það fyrsta bragðast þær aðeins öðruvísi þar sem bæði haframjöl og bókhveiti smakkast öðruvísi en hvítt hveiti. Þó þær smakkist ekki nákvæmlega eins fannst mér þær ekki síðri. Ég fékk aðeins meiri “morgunverðarfíling” þegar ég borðaði þær og ætli það sé ekki vegna þess að við tengjum haframjöl oftast við morgunmat. Ég toppaði þær því ekki með sultu og rjóma heldur með jógúrt, hnetusmjöri og ávöxtum svo eitthvað sé nefnt. Ef þú ert frekar í stuði fyrir hefðbundnar vöfflur úr venjulegu hveiti erum við auðvitað með uppskrift af æðislega góðum vegan vöfflum hér.
Nú er haustið að koma, ég finn það. Laufin hérna í Piteå eru farin að skipta um lit og ég finn hvernig ég fyllist lífi í kjölfarið. Ég hlakka til að deila með ykkur gómsætum uppskriftum í haust og vetur. Ég veit ekki hvað það er, en mér finnst erfitt að finna innblástur í matargerð á sumarin. Mér finnst yfirhöfuð erfitt að finna fyrir innblæstri almennt á sumrin og finnst tíminn einhvernveginn standa í stað. Ég fagna því haustsins á hverju ári og finn að hugmyndir af matréttum og bakstri koma svífandi til mín. Hvaðan þær koma veit ég ekki, en ég þakka fyrir pent.
Þema haustsins hér á blogginu verður að miklu leyti matur eldaður frá grunni, matur sem nærir líkama og sál. Matarmiklir réttir stútfullir af grænmeti og baunum og minna af réttum úr tilbúnu vegan kjöti, þó það verði svo sannarlega til staðar líka. Við höfum síðustu ár lagt mikið upp úr að sýna öllum hversu einfalt og gott það er að elda og borða vegan mat. Það er, og hefur, alltaf verið eitt af okkar stóru markmiðum. Að gera mat sem hentar öllum, hvort sem viðkomandi er vegan eða ekki. Núna í haust viljum við leggja áherslu á að sýna ykkur hversu mikið grænmeti, baunir, tófú, kornvörur og önnu hráefni úr plönturíkinu hafa upp á að bjóða. Fjölbreytileikann sem grænmeti og baunir hafa. Og ekki nóg með það heldur eru það oft þau ódýrustu hráefnin.
En í dag eru það vöfflurnar sem eru í aðalhlutverki. Vöfflur sem ég myndi einmitt segja að næri líkama og sál. Vöfflur sem öll fjölskyldan getur notið í morgunmat og toppað með því sem hverjum og einum þykir best. Sjálf finnst mér best að hafa blöndu af: Sætu, söltu, rjómakenndu, fersku og stökku. Ég held að þetta eigi við um allt sem ég borða. Ferskar jurtir eru mikilvægur partur af öllum mínum máltíðum og ég toppa yfirleitt allan mat með einhverju stökku, hvort sem það eru fræ eða hnetur.
Til að uppfylla öll þessi skilyrði sem ég nefndi hér að ofan toppaði ég vöfflurnar með eftirfarandi:
Eplum og banönum: Sætt og ferskt
Jógúrt: Rjómakennt
Hnetusmjöri: Salt og rjómakennt
Ristuðum möndlum, heslihnetum, hempfræjum og ristuðum kókosflögum: Stökkt (hvaða hnetur og fræ hefðu virkað hérna, ég tók bara allskonar sem ég átti til uppi í skáp)
Kanil: Bara af því hann er svo góður!
Eins og ég segi er þetta eitthvað sem hægt er að leika sér endalaust með og ég mun kannski toppa þær með einhverju allt öðru þegar ég baka þær næst. Mér þætti gaman að heyra hvað þér þykir best á vöfflur?
Ég vona innilega að ykkur líki vöfflurnar og hlakka til að deila með ykkur góðum haustuppskrftum á næstu mánuðum. Endilega heyrið í okkur ef það er eitthvað sérstakt sem þið viljið sjá á blogginu, við tökum öllum hugmyndum fagnandi. Hafið það gott! <3
-Helga María
Iljandi vegan vöfflur úr bókhveiti og höfrum
Fyrir: 2-4
Þessar dásamlegu vöfflur eru frábær morgunmatur en á sama tíma fullkomnar að bjóða uppá með síðdegiskaffinu. Toppið með hverju sem ykkur lystir, sultu, rjóma, ávöxtum, jógúrt, hnetum eða ís. Leyfið hugmyndarfluginu að ráða.
Hráefni:
- 100 g bókhveiti (sirka 2 dl)
- 100 gr mulið haframjöl (sirka 2,5 dl)
- 1 msk mulin hörfræ eða chiafræ
- 2 tsk kanill
- Hafsalt á hnífsoddi
- 1/4 tsk vanilluduft (má skipta út fyrir vanilludropa)
- 1 tsk lyftiduft
- 3 dl vegan mjólk (má bæta við ef deigið er alveg ótrúlega þykkt, hafið samt í huga að þetta deig er þykkara en hefðbundið vöffludeig)
- 2,5 dl Joe' kurt vanillujógúrt frá Naturli
- 50 g vegan block smjörlíki frá Naturli
- 2 msk hlynsíróp
Aðferð:
- Byrjið á því að setja haframjölið í matvinnsluvél eða blandara og myljið.
- Myljið hörfæin líka ef þið eigið bara til heil. Ég geri það yfirleitt í kaffikvörn en það virkar auðvitað að nota matvinnsluvél eða blandara.
- Setjið í skál ásamt restinni af þurrefnunum og hrærið saman.
- Bræðið smjörlíkið og leyfið því að kólna örlítið áður en þið bætið því saman við ásamt restinni af hráefnunum. Mér finnst gott að skilja eftir smá í botninum til að nota til að smyrja vöfflujárnið með. Bætið örlítilli mjólk saman við ef deigið er alveg virkilega þykkt. Passið samt að hræra ekki um of því við viljum ekki að vöfflurnar verði þurrar.
- Hitið vöfflujárnið og leyfið deiginu að standa á meðan.
- Smyrjið vöfflujárnið með smjörlíki og steikið hverja vöfflu í nokkrar mínútur eða þar til hún hefur fengið gylltan og fínan lit. Ég fékk úr uppskriftinni 4-5 vöfflur.
- Berið fram með því sem ykkur lystir.
-Uppskriftin er unnin í samstarfi við Naturli á Íslandi-
